26 თებერვალს ოქროყანაში 28-ე საშუალო სკოლის სპორტულ დარბაზში ქართული ჭიდაობის სექცია გაიხსნა. სექციის გახსნის ინიციატორი ქართული ჭიდაობის ფედერაციაა, რომელის პრეზიდენტის - უშანგი ყურაშვილის აქტიურობით თებერვლის თვეში თბილისს ქართული ჭიდაობის 2 სპეციალიზირებული სკოლა შეემატა. ოქროყანის სპორტულ დარბაზში  ყურაშვილმა სპორტის დამსახურებული ოსტატის წოდება მიანიჭა საქართველოს 8-გზის ფალავან - ალექსი დავითაშვილს.

ქართული ჭიდაობის სკოლის გახსნის პრეზენტაციაზე მოქმედმა და ვეტერანმა სპორტსმენებმა და ჭიდაობის ფედერაციისა და სპორტის დეპარტამენტის წარმომადგენლებმა მოიყარეს თავი. აქვე გახლდნენ ევროპის სამგზის ჩემპიონი - ზაზა კედელაშვილი და მსოფლიოსა და ევროპის ჩემპიონი ახალგაზრდებს შორის - ვარლამ ლიპარტელიანი. ახალგაზრდა მოჭიდავეებს ვარჯიში ცნობილმა მწვრთნელმა გურამ მოდებაძემ ჩაუტარა, რომელიც ოქროყანის სკოლაში ამიერიდან მსურველებს კვირაში 3-3 ჯერ ძიუდოსა და ქართულ ჭიდაობაში ავარჯიშებს.

ქართული ჭიდაობის ფედერაციის პრეზიდენტის - უშანგი ყურაშვილის თქმით, მსგავსი სექციები მომავალში სხვა სკოლებშიც აუცილებლად გაიხსნება  და საერთო ჯამში, ქართულ ჭიდაობას დიდი ყურადღება მიექცევა.

გიორგი ჭანიშვილის ფოტოები ოქროყანიდან